“ လွမ်းခွင့်ရှိပါရဲ့လား ”
“ အလွမ်း ” တဲ့လား ...
စာလုံးလှသလောက် အရမ်းကြောက်စရာကောင်းတယ်။
“ အလွမ်း ” တဲ့လား ...
နှုတ်က ရွတ်လို့ကောင်းသလောက် ခန့်မှန်းရခက်တယ် ။
“ အလွမ်း ” ဆိုတဲ့နောက်မှာ
အယောင်ဆောင်တွေ ကိုယ်ယောင်ဖျောက်တွေနဲ့
စိတ်ရဲ့ ဒဏ်ရာတွေက ကိုယ်ထင်ပြ လမ်းသလားလို့ ။
“ အလွမ်း ” ရဲ့ရှေ့မှာတော့
ခံနိုင်ရည်နဲ့ နှစ်သိမ့်စရာ တံတိုင်းအတွက်
ဖြေဆေးတစ်မျိုးက ခုမှအရှာထွက်တုန်း ။
“ လွမ်းခွင့်ရှိပါရဲ့လား ” လို့
ခွင့်တောင်းရတဲ့အစဉ်အလာ ရှိခဲ့ရဲ့လား ...
ငိုရှိုက်သံတွေ မြေမမြှုပ်လိုက်ပါနဲ့ချစ်သူရယ် ...
လွမ်းရင်းနဲ့ မျက်ရည်မကျခဲ့ပါဘူး ၊
လွမ်းရင်းနဲ့ အော်ဟစ်မငိုခဲ့ပါဘူး ၊
အလွမ်းကို တသသနဲ့
ရင်ဘတ်ထဲမှာ သိမ်းထားရင်ပဲ လုံလောက်တယ် ...။ ။
0 comments:
Post a Comment